bibliomontecarrasco

Información xeral da Biblioteca

Arquivo para a categoría “INICIO”

O FALADOIRO MAIOR TAMÉN SE SUPERA!

Non hai pandemia que nos impida ler e xuntármonos a compartir a experiencia! Fomos quen de cambiar o noso recuncho faladoiro da Biblioteca polas novas tecnoloxías para vernos e falar de “Aquitania” a través dunha video conferencia. Superados (ou case) algúns impedimentos técnicos e loxísticos, voz e imaxe saíron ao ar para expresar o que Eleanor de Aquitania e o relato dunha parte da súa vida tiña feito sentir a este feixe de comprometidos lectores e lectoras.

Esta obra de Eva García Sáenz de Urturi, galardonada co último premio planeta, deunos para unha interesante posta en común na que se tocaron aspectos de índole lingüístico e literario, e tamén histórico. Un mundo de contrastes, realidades irreais e contraditorias por veces, xunto con elementos característicos e contrastados da auténtica raíña de Francia. Unha vida interior cando menos intensa que sorprende por excesiva, ou non, aventada polas circunstancias que mesturan ficción e historia, nun mundo de personaxes con motivacións dispares para manterse vivos… Ninguén permanece indiferente ante o que a lectura debuxa ante a nosa mirada.

Para o vindeiro encontro, no mes de marzo, temos dúas propostas. Unha novela gráfica, Django Mano de Fuego que conta a historia dunha lenda do Jazz, e outra novela tradicional, nesta ocasión de orixe nórdico, que se titula Estado del Malestar, de Nina Lykke, na que se provoca unha reflexión sobre o tan manido estado de benestar que se atribúe a Europa do Norte.

Así que agora toca ler! Moita saúde e moito ánimo!

O FALADOIRO: Primeira lectura superada!

Á volta das vacacións de Nadal, todos e todas cos deberes feitos, puxemos en común as nosas impresións sobre a lectura do libro “A lección de August”. Foi unha obra que gustou e espertou o interese nalgúns incondicionais por continuar a saga das historias dos distintos personaxes que debuxan a contorna do pequeno August. Entrañable viaxe polas experiencias deste neno que nos vai descubrindo o que é ser e sentirse diferente, para ben e para mal, ás veces, e que se fai lección de vida para pequenos e grandes, axudando a reflexionar sobre os nosos comportamentos cotiás. Axudados polas visións do resto dos personaxes que rodean ao protagonista, somos quen de poñernos na pel, ou nas diferentes peles, dos que ven a vida dende outras ópticas.

E agora imos coa segunda obra. Imos retomar unha lectura do curso pasado. Lembrades a Calpurnia? Pois imos intentar descubrila novamente neste club deste curso. A ver que sae destas mentes lectoras e activas que están entusiamadas coa aventura!

Mantédevos á escoita para saber en que resulta todo isto…. Vémonos pronto!

GUÍAS DE LECTURA PARA O NADAL

Chega o tempo de lecer, do descanso e da lectura... Tamén dos agasallos e dos premios, así que dende a Coordinadora de Equipos de Dinamización da Lingua da nosa comarca facilítannos estas interesantes guías para facérmonos idea do que se coce no mundo editorial, e do que pode resultar de interese para todos e todas os da casa. Botádelle un ollo...

As falas do Morrazo

Velaí a orixinal recreación de distintos exemplos da singular fala da nosa contorna.

Unha realidade que loita por seguir sendo viva, a pesares das crecentes dificultades que atopa para sobrevivir. Paremos a súa extinción. Fagamos algo por traela cada día á nosa boca.

https://www.youtube.com/watch?v=sWQzcIut-Ak

https://www.youtube.com/watch?v=szimn66qU7w

https://www.youtube.com/watch?v=EyCUximPV4k

O Faladoiro Maior, tamén en marcha.

Finalmente decidimos retomar as aventuras lectoras no Faladoiro dos grandes. Na primeira reunión decantámonos por unha premiada escritora para comezar a camiñar polo medievo. Ana Gª Sáenz de Urturi, e a súa obra “Aquitania” teñen como misión devolvernos ao mundo das lecturas compartidas, das reflexións serenas e ao recuncho lector do outono-inverno, en tanto fóra a natureza xoga coas luces e sombras da realidade na que vivimos. Boa singradura nos mares do Morrazo!

Bota a andar o CLUB DE LECTURA O FALADOIRO

A nosa primeira lectura deste curso 2020-2021

Hoxe comezamos nova andadura do noso veterán club de lectura. Un grupazo humano de lectoras e lectores de primeiro xuntámonos no lecer na biblioteca para comezar singladura. Inaugurámolo coa lectura da obra “La lección de August” da autora colombiana RJ Palacio. Faremos reunións cada dúas semanas nos recreos longos dos martes, e xa fomos debullando propostas de novas lecturas para o futuro… Van saíndo títulos e autores que son do agrado deste grupo de lectores e lectoras, que, cheos de entusiasmo, queren descubrir mundos novos nunca explorados nos que recalar. Atendendo ao lema deste curso “Xeografías lectoras“, botámonos ao camiño! Acompañádesnos?

NOVIDADES EDITORIAIS

A biblioteca continúa ampliando a oferta de libros e películas para que todos vós poidades ler e mirar os últimos títulos que chegan ao mercado.

Botádelle un ollo a todo o que aquí conteñen as imaxes, e seguide pendentes do que aínda está por vir! Estamos coas fichaxes de inverno!

Feliz lectura!

Consulta o noso catálogo

Desde este enlace poderás consultar o noso catálogo para solicitar o libro que desexes ler. Fai a busca escribindo o nome do autor ou o título do libro, e anota o número de rexistro, tendo en conta que non estea xa emprestado.

Catálogo IES Monte Carrasco – MEIGA

Despois só tes que enviar un correo electrónico ao seguinte enderezo:

emprestitocarrasco@gmail.com

indicando quen es, o teu número de carné de lector, o título do libro solicitado para o empréstito e o número de rexistro deste exemplar. Unha vez formalizado o proceso farémosche entrega do libro á maior brevidade posible no punto de entrega da Biblioteca, sinalado para tal fin na entrada principal do instituto. Lembra que temos dous recreos para este fin, o do mércores e o do xoves!

Nese mesmo enderezo podedes facer consultas e suxestións que estaremos encantados de escoitar e atender, sempre que sexa posible.

Saúde!

Estamos de volta!

Despois de cinco longos meses sen asomarse ao mundo dende a fiestra da nosa biblioteca, e de case dez refuxiados no interior dun sinfín de páxinas non buscadas, estamos de regreso… E non son poucas as novidades que este novo espazo-tempo nos está obrigando a asumir a paso apurado, non sempre pousándose na beira máis cómoda do camiño. Polo de pronto, a nosa querida biblioteca, repeinada e en proceso de renovación funcional e estética, ten que mudarse para deixar sitio ás medidas de protección colectiva contra o bicho que veu estragalo todo na pasada primavera.

Mudarse non significa marchar. Seguimos, doutra maneira, co respirador conectado, para non entrar en estado crítico, pero vivos. Segue o noso fondo bibliográfico a medrar, aínda que agora teredes que consultalo na rede para saber as novidades que van chegando, e as vellas glorias que están ao voso dispor para un empréstito pracenteiro de lectura e aprendizaxe. Non deixedes de vir, aínda que as formas cambien. As visitas virtuais teñen algo de máxico, e aquí agardámosvos cos brazos e as páxinas abertas, coma sempre, para facilitarvos toda a nosa axuda.

Estamos a actualizar títulos na nosa Biblioteca Inclusiva, tamén nos fondos audiovisuais incorporamos novidades, e estamos desexosos de oír todas as vosas propostas, sempre moi benvidas, para construír o noso bibloespazo favorito.

Así que aquí vos agardamos, un novo curso, para que non falte nada. Permanecede atentos e atentas ás vosas pantallas, onde iremos debuxando as novas instrucións para os empréstitos. Alí tamén aparecerá o enderezo de correo electrónico onde teredes que solicitar os libros que queredes ler, e os prazos e lugares de entrega, e onde estaremos felices de recibir as vosas suxestións, consultas, e toda a vida da nosa Biblioteca.

De novo no camiño. Coidádevos, coidádeme.

Sempre vosa, a Biblioteca.

NOVA LECTURA

El príncipe y la modista, da escritora e ilustradora Jen Wang (Editorial SAPRISTI) é unha novela gráfica na que se oculta un segredo inconfesábel…

Un comic que se le moi fácil sobre a busca da identidade dun adolescente, nun escenario de príncipes, princesas… onde non todo é o que parece.

FELIZ LECTURA!

Modista12 (1)

Engadir unha lenda

 

Navegación de artigos