Exposición de exemplares da Revista A Gaivota

     

        Estas semanas temos no hall do instituto unha exposición organizada pola Biblioteca con moivo da Semana da prensa onde se recolle unha pequena escolma de números antigos da revista do Monte Carrasco: A Gaivota. Podemos ver a través destes exemplares a evolución do noso centro dende finais dos anos oitenta, cando era colexio de EXB, até hoxe, coma Instituto de Ensino Secundario. Tamén se pode observar a evolución de formatos da propia revista, desde folios grapados mecanografiados até a impresión láser e o formato dixital da actualidade.

       Porén, a serie non está completa, faltan exemplares tan valiosos dende o punto de vista histórico, educativo e, sobre todo sentimental, coma os números 1 e 2. Por iso, se algún dos lectores posúe algún destes números ou coñece a alguén que os teña, lle estaríamos moi agradecidos se se puxera en contacto connosco.

Pálida como la luna e outras novidades do club de lectura

O pasado xoves tivemos xuntanza no recreo para comentar o libro do 2º Trimestre, Pálida como la luna, de Mary Higgins Clark. Houbo opinións para todos os gustos, dende rapaces ós que lle enganchou a trama de intriga sobrenatural e leron a novela sen respirar até os que non acabaron o libro porque non lles resultou atractivo. Queda pendente ler algún relato de medo de Edgar Allan Poe e, xa de cara ao terceiro trimestre, o equipo de Biblioteca lanza a idea de ler algún clásico de Michael Ende, como Momo ou A Historia Interminable, cuxa adaptación ao cine marcou á miña xeración.

Lectura para o 3º Trimestre: “Doña Flor y sus dos maridos”

Á volta das vacacións de Semana Santa, en data por concretar, o club de lectura de adultos fará unha xuntanza para comentar a novela acordada na última reunión: Doña Flor y sus dos maridos, de Jorge Amado.  Publicada en 1966, trátase dunha das obras máis coñecidas do escritor brasileiro. Pódese encadrar dentro das coordenadas do realismo máxico latinoamericano, xa que conxuga elementos costumbristas e sobrenaturais, escrita con lirismo e sensualidade. Un goce para os sentidos, coa arte culinaria moi presente ao longo das súas páxinas. Agardemos que sexa do gosto dos vosos padais.